Ururka filim qaadayaasha oo marti u ah Barbaarta

Barnaamijka Barta Kulanka Barbaarta waa barnaamij todobaadle ah oo Bar-kulan ka baxa maalmaha Tallaadada iyo Arbacada. Barnaamijka ayaa waxaan idin kugu soo gudbinaa wararkii Barbaarta iyo Xubno dhawro ah oo xiisa badan.Barnaamijka Barbaarta waxaan kaga hadleynaa urur dhowaan looga dhawaaqay Mogadishu oo La magac baxay Somali National Union of Photographers S.N.U.P, urukan Waxaa ku mideysan Film qaadayaasha Somaaliyeed Waxaa Gudoomiye loogu dhigay Ismaaciil Warsame oo ka hadlaya qaabka loo Horumarin lahaa shaqada Film qaadista Soomaaliya.
Barnaamijka oo dhameystiran waxaad ka dhageysan kartaa boggaan qeybtiisa hoose.

Idaacada Jigjiga FM 99.1 oo Kordhisay Baaxada Daboolkeeda iyadoo Gaadhay Degmooyin Kale

Jigjiga (Guled Casowe Blog) Wasiirka Xafiiska Warfaafinta Dhaqanka iyo Dalxiiska Mudane Guuleed Casoowe ayaa sheegay in idaacada Jigjiga FM 99.1 ay haatan gaadhay degmooyin aad u badan. Wasiirka oo la hadlayay saxaafada Degaanka Soomaalida yaa sheegay in war laliye dhererkiisu yahay 85 Mitir oo laga taagay dusha Buurta Kaara Mardha ay u saamaxday in idaacadu ay haatan gaadho degmooyin aad u badan.

Wasiirku waxaa uu intaa ku daray in ilaa haatan ay xaqiijiyeen in idaacadu si nadiis ah looga dhagaystay oo ay baahinteedu gaadhayso degmooyin badan oo kala ah, Dhagaxle (39 Km) Qabri Bayax (51 Km), Baabili (52 Km), Dambal (54 Km) Awbare (65 Km), Fiiq (90 Km) Shiniile (106 Km) Erer (152) Dhagax-Buur (153 Km) Dhagax Madow (154 Km) Ayshica (160 Km) Huuraale (184 Km) Sagag (186 Km) Awaare (193 Km) Xamaro (197 Km) Af Dam (197 Km) Laga Hida (204 Km) Gunagado (214 Km) Garbo (234 Km) Salaxaad (244 Km) Sheygoosh (250 Km) Dhuxun (252 Km).

Sidoo kale, waxaa uu Mudane Guuleed Casoowe uu sheegay in tijaabadan ay tahay tii koowaad ee ay War laliyaha Kaaramardha uu sameeyo, oo marka ku xigta la filayo in la gaadhsiiyo xaga Bariga ilaa Badwaynta Hindiya xaga Waqooyigana la gaadhsiiyo ilaa Bada Cas. Waxaa uu Wasiirku Mudane Guuleed Casoowe sheegay in tijaabada labaad ee tan ku xigta lagu sii dayn doono degmooyinka Gaashaamo (303 Km) Dhanaan (326 Km) Iimeey Bari (327 Km) , Iimeey Galbeed (332 Km) Qabri Dahar (334 Km) Danood (340 Km) wardheer (387 Km) Godey (387 Km) Dhoobo Weyn (396 Km) Ceel Kari (398 Km) Cadaadle (404 Km) Goro Baqaqsa (406 Km) Shilaabo (424 Km) Gura Dhaamoole (425 Km) Qalaafe (447 Km)

Tan iyo intii la furay idaacada Jigjiga FM 99.1 ayaa waxaa aad u soo dhaweeyay shacabka Degaanka Soomaalida iyadoo noqotay idaacadii ugu horeeysay ee ay leedahay Dawlad Degaanka Soomaalida. Idaacadan ayaa noqotay isha qudha ee shavabka Jigjiga iyo nawaaxigeedda ku nool ay kala socdaan waxa ka dhacaya Degaanka iyo dunida inteeda kaleba. Waxaa kaloo ka qayb qaatay dhalinyaro aqoonyahano ah oo ku nool dalalka dibada oo barnaamijyo khaas ah u soo diyaariyay Idaacada Jigjiga FM 99.1. Isaga oo taas tusaalaynaya waxaa uu Wasiirku tusaale u soo qaatay in ardayda u dhalatay Degaanka Soomaalida ee wax ka barta dalka Hindiya ay barnaamijyo u soo direen idaacada Jigjiga FM 99.1 oo ay shacabku aad uga heleen.

Wasiirka Warfaafinta Dhaqanka iyo Dalxiiska Mudane Guuleed Casoowe ayaa dhinaca kale ka sheegay in Bishan Ramadaanka badhtamaheeda la filayo in Degaanku uu furo idaacada telefeshinka uu Degaanku leeyahay.

Guled Casowe Blog

Wasiirka Warfaafinta oo La Kulmay Gudoomiye Ku Xigeenka 2aad ee Ururka ONLF & Gadh Wadeenka Wafdiga Wada Hadalada Nabada ee Ururka ONLF

Jigjiga (Guled Casowe Blog) Wasiirka Warfaafinta Dhaqanka iyo Dalxiiska ee Dawlad Degaanka Soomaalida Mudane Guuleed Casoowe ayaa xafiiskiisa ku qaabilay Gudoomiye Ku Xigeenka 2aad ee Ururka ONLF Mudane Cabdirashiid Shariif Cali iyo Gadh Wadeenka Wafdiga Wada Hadalada Nabada ee Ururka ONLF Mudane Maxamed Faarax Coloow.
Wasiirka Mudane Guuleed Casoowe iyo labada masuul waxay ka wada hadleen arrimo badan oo ay ka mid tahay sidii dedaalka iyo geedi socodka wada hadalada nabadeed ee u dhexeeya Ururka ONLF & dawlada Itoobiya loogu baraarujin lahaa bulshada Degaanka Soomaalida, iyadoo la adeegsanayo saxaafada & hanaanka warbaahinta ee Degaanka Soomaalida iyo dalka intiisa kale.

Kulankan oo ka dhacay Xafiiska Warfaafinta Dhaqanka iyo Dalxiiska ayaa waxay masuuliyiinta Ururka ONLF ee kala ah Gudoomiye K/Xigeenka 2aad Mudane Cabdirashiid Shariif Cali iyo Gadh Wadeenka Wafdiga ONLF ee Wada hadalada Mudane Maxamed Faarax Coloow ay booqdeen Xarunta Warbaahinta Dawlad Degaanka Soomaalida oo saldhig u ah Idaaacada Jigjiga FM 99.1 iyo Telefishanka la iska arko ee muddo dhaw laga hirgalin doono Degaanka Soomaalida.

Gudoomiye Ku Xigeenka Mudane Cabdirashiid Shariif iyo masuulka kale ee Maxamed Faarax Coloow ayaa booqashadan ka dib Shabakada CakaaraNews u sheegay inay aad ugu bogeen xawliga uu ku socda dedaalka horumarka degaanka ka jira.

Dhanka kalana, Wasiirka Warfaafinta Mudane Guuleed Casoowe ayaa wafdiga soo booqday aad ugu bogaadiyay talaabada geesinimada leh ee ay ku qaateen in nabad lagu soo dabaalo gayiga Degaanka Soomaalida Itoobiya. ku socdo
Guled Casowe Blog

Madaxa Warfaafinta oo La Kulmay Gudoomiyaha Jaaliyada Degaanka ee Dalka Denmark

Jigjiga (Guled Casowe Blog) Madaxa Xafiiska Warfaafinta Dhaqanka iyo Dalxiiska Mudane Guuleed Casoowe ayaa maanta Xafiiskiisa ku qaabilay Gudoomiyaha jaaliyada Degaanka Soomaalida ee Dalka Denmark Mudane Dhuux Cabdi Cumar.

Gudoomiyaha jaaliyada Degaanka Soomaaalida Mudane Dhuux Cabdi Cumar waxaa booqashadiisa ku weheliyay Maareeyaha Hay'ada Ilaalinta Bii'ada (Degaanka) ee Save The Environment Ethiopia Mudane Geedi Maxamuud Goohe.

Labadan masuul ayaa soo booqday Xafiiska Warfaafinta Dhaqanka iyo Dalxiiska iyo Dhismaha Wakaalada Warbaahinta (Mass Media Agency).



Madaxa Xafiiska Warfaafinta, Dhaqanka iyo Dalxiiska Mudane Guuleed Casoowe iyo Gudoomiyaha jaaliyada Degaanka Soomaalida ee Denmark Mudane dhuux cabadi Cumar waxay ka wada hadleen arrimo badan oo khuseeya doorka saxaafada iyo wacyi galinta jaaliyadaha. Waxaa labada masuul ay isla soo qaadeen sidii loo xoojin lahaa iskaashiga u dhexeeya xukuumada Degaanka Soomaalida iyo jaaliyadaha qurbo joogta ah.

Madaxa Warfaafinta Mudane Guuleed Casoowe ayaa carabaabay mudnaanta ay xukuumada Degaanku Soomaalidu haatan u hayso sidii ay u kobcin lahayd kasbashada iyo soo jiidashada bulshada qurbo joogta ah ee u dhalatay Degaanka Soomaalida. Waxaa uu Mudane Guuleed Casoowe xusay in maanta Degaanka Soomaalidu uu ku talaabsaday talaabooyin muhiim ah oo ay ugu wacan tahay heshiisyada nabada ee lala gaadhay Ururka UWSLF iyo wadahadalka nabad ee haatan ka dhex socda Ururka ONLF iyo Dawlada Itoobiya.

Dhinaca kale, Gudoomiyaha jaaliyada Qurbo Joogta ee dalka Denmark, Mudane Dhuux Cabdi Cumar ayaa isna geestiisa ka sheegay in isagoo ku hadlaya magaca Jaaliyada Degaanka Soomaalida ee dalka Denmark ay maanta sharaf u tahay inuu xukuumada Degaanka Soomaalida ugu hambalyeeyo talaabooyinka wax ku oolka ah ee ay ku talaabsatay. Waxaa uu Mudane Dhuux tilmaamay in dedaalka wada hadalada nabada ee Xukuumadu ay gashay ay kor u qaaday kalsoonidii Jaaliyadaha qurbaha ku noolaa. Waxaa kale oo Mudane Dhuux carabaabay in talaabadii Xukuumada Degaanka Soomaalida ay dhawrka goor ku sii daayeen boqolaal maxaabiis ah ay abuurtay yididiilo san iyo rajo wanaagsan oo qurbo joogtu ay ka qabaan Degaanka Soomaalida.

Ugu danbayntii, waxaa masuulada soo booqday iyo Madaxa Xafiiska Warfaafinta Dhaqanka iyo Dalxiiska Mudane Guuleed Casoowe ay booqasho gaaban ku tageen Wakaalada Warbaahinta ee Degaanka Soomaalida oo haatan ay ka shaqayso Idaacada Jigjiga FM 99.1. Waxaa masuuliyiintu ay booqdeen shaqaalaha Idaacada Jigjiga FM 99.1. Waxaa kaloo ay indha-indheeyeen sida ay u socoto hawsha diyaarinta Idaacada La iska Arko ee SRSTV oo ah idaaacad telefeshin oo uu yeelan doono Degaanka Soomaalida.

Guled Casowe Blog

Maxaad ka Og Tahay Taariikhda Hasha Caanka Ah ee Garawo, Dhagayso Waraysigan

Jigjiga (Guled Casowe Blog) Dhawr bilood ka hor ayaa Xafiiska Warfaafinta, Dhaqanka & Dalxiiska waxaa uu shaaca ka qaaday in ay ku tala jiraan inay Taalo lagu maamuusayo Hashii caanka ahayd ee Garawo laga dhisi doono badhtamaha Tuulada Garawo oo ay ku taalo xabaashii ay ku aasnayd hashaasi.

Hadaba, waxaa Xafiiska warfaafinta Dhaqanka & Dalxiisku uu sameeyay daraasaad uu ku darsayo taariikhda dhabta ah ee Hasha Garawo, waxaana uu koox khabiiro cilmi baadhis ah u diray degaanada Dhagax-Buur, Gunagado, Dhagax-Madow, Sheygoosh & Awaare oo taariikhda Hasha Garawo ay wakhtiyo kala gadisan soo martay.

Kooxda Xafiiska Warfaafinta oo isugu jiray khabiiro cilmiga aataartka ku takhasusay & wariyayaal suxufiyaan ah ayaa waxaa ay baadhitaankooda waraysiyo la yeesheen dad badan oo taariikhda Hasha Garawo wax ka ogaa.

Dadka ay waraystaan waxaa ka mid ahaa oday la yidhaahdo Maxamed Cabdi Nuux Gacan jalab oo ah tafiirtii odaygii Shiil Cusmaan Ciid ee lahaa Hasha Garawo, iyo Gudoomiyaha Tuulada Garawo ee haatan Cabdulaahi Qalinle Buraale.

Hadaba waxaan halkan idiinku soo gudbinaynaa waraysiyo kala gadisan oo aan labada qof la yeelanay oo ay kaga jawaabayaan su'aalo badan oo aad u xiisa badan oo ay ka mid yihiin:

1) Halkay ku dhalatay Garawo? imisa ubad ah ayay dhashay? Imisa jir ayay ku dhimatay? Sidee loo maali jiray Garawo? Awr noocma ah ayaa abaahiyay Garawo hooyadeed? Halkee Garawo ay ku calool gashay?

2) Sidee loo aasay Garawo? Imisa daaqadood oo maro ah ayaa lagu kafmay? Xoolo intee le'eg ayaa aaska Garawo ku baxay?

3) Maxaa keenay jacaylka ilaa xadka le'eg in loo qabo neef xoolo ah? Halkee ku danbeeyeen tafiirtii Garawo?

4) Aasida Hasha Garawo ma waxay ahayd hindise & hawl uu shaqsi gaar ahi qabtay, mise hawl guud oo jamac ahaan bulshadu u qabatay?

5) Xaalada haatan ay ku sugan tahay xabaashii Garawo waa sidee? Shacabku ma ogol yahay in taalo loo dhiso lagu maamuusaayo Hasha Garawo?

6) Qisooyinka mucjisada & la yaabka leh ee ku aroora hasha Garawo, kuwee xaqiiq ah kuweese ku tidhi ku teen ah?

7) Halkee ku haboon in Taalada Hasha Garawo laga dhiso? Ma meesha ay ku calool gashay oo Sheygoosh ah? Ma meeshii ay Nirigtii ugu horaysay ay ku dhashay oo aagga Gunagado ah? Ma meeshii ay ku dhimatay oo Tuulada Garawo ah?

Fadlan, waxaa Xafiiska Warfaafinta Dhaqanka & Dalxiiska ee Dawlad Degaanka Soomaalida uu si wayn u soo dhawaynayaa wixii fikrad & talo ah ee ku aadan sidii loo hirgalin lahaa taalada lagu xusayo Hasha Caanka ah ee Garawo.



Wadani

Inta Giib sokeeye ah ka kacay, geyiga Soomaali
Inta Gumar mid daaqsiiya iyo, geeri la-xasuusto
Mid Ganboor u qooshiyo intay, mudatay Geel-tooshe
Laylis aan la-geda-barin intuu, goonni ula buubay
Gabnay iyo Gulaal buu noqdaa, Garawo Awrkeede
Hadba Goray an guux yeelan baa, Geel u doobsada'e
Wuxuun baa gollaha kaga jiroo, gaar u fiigsada'e,
Gab-gabliyo waxaa lagu salliday, Gaabis aan taline
Faarax Cawil Jaamac - Buluqbaash

Shawi

Haddii uu nin gabadh doono oo guunyo badan dhiibo
In kastuu Gammaan soo dhuroo gobi is laab raacdo
Gacaladuba waxay saaran tahay sidigta Gooraane
Haddii Gool la qalo oo hilbaha laysu wada geeyo
Gogosha iyo Guurtida fadhida geelow adigaa leh

Iyadoo Hilaac galalac yidhi Garawo soo raacday
Iyadoo daruuraha gabdhamey dibugu soo guurtey
Iyadoo Gargaro meel leh iyo galax bannaan joogta
Guutooyin loo dhuray haddii weerar lagu gaadho
Cilmi Ismail Liibaan “Boodhari”

Anba gawska waan heysana gabnoo sumace,
Ma gabdheey ahayeen ragii garawo maalaayay
Cabdi Maxamed Aw Magan (Cabdi Galayax)

Geela

Gadhtallawga maantay Nugaal Garawo soo aaddo
Iyada oo Harraad gubey ninkii Guuliyaan ahaye
Garanuug an toogtiyo ri' aan galin dhan hiigaayay
Maxamed Cabdulle Cali (Gammuute)

Guur Aan Ka La'aado
Gaar gaarka awrtiyo nirgaha geela laga reebay
Guri jooga xoolaha midaan goosanka u diidin
Een garanin soo dheellan ee guriga uun joogta
Gudbantaan halkayguba galayn guur aan ka laaado

Allow garawo giirkiyo afkiyo ganafka taagaysa
Oo qoolka uun kula galdii magac waxay gaadho
Gandihii miduu wada nacee gacal ka fiigaysa
Gool boodadii laga samree gooysay ubadkeeda
Intay dhiig isoo galin lahayd guur aan ka laaado

Guled Casowe Blog

Jigjiga FM 99.1. Oo Sii Hormarisay Barnaamijyada Madadaalada & Wacyi Galinta ee Ay Sii Daynayso

Jigjiga (Guled Casowe Blog) Madaxa Xafiiska Warfaafinta Dhaqanka & Dalxiiska Mudane Guuleed Casoowe ayaa maanta saxaafada u sheegay in idaacada Jigjiga FM 99.1 ay sii balaadhinayso barnaamijyadeeda ku aadan wacyi galinta & madadaalada bulshada.

Mudane Guuleed Casoowe shir jaraa'id ku qabtay xafiiskiisa ayaa tibaaxay in mudadii todobaadka ahayd ee ay idaacada Jigjiga FM 99.1 ay hawada ku jirtay ay heleen talo bixin & fikrado aan la soo koobi karin oo aan la qiyaasi karin.

"Maalintii labaad ee idaacada ay hawada ku jirtay waxaa xarunta warbaahinta soo gaadhay 4,000 oo taleefan oo dhagaystayaashu ay soo waceen, iyagoo soo gudbinayay tahniyado, hambalyo, bogaadin & fikrado wax tusaalayn ah". ayuu yidhi Mudane Guuleed Casoowe.

Isagoo hadalkiisa sii wata waxaa uu Madaxa xafiisku sheegay "Tiradan intaa le'eg waxay nagu noqotay wax aanan sii filanayn oo amakaag iyo fajac nagu abuurtay". ayuu raaciyay Mudane Guuleed Casoowe.
Mar uu ka hadlayay barnaamijyada ay haatan idaacadu soo gudbiso waxaa uu Mudane Guuleed Casoowe carabaabay in ku talagalkoodii hore ay badaleen. "Maadaama haatan loo gudagalay tartankii Koobka Aduunka ee Kubada Cagta ee South Africa 2010, waxaa qasab nagu noqotay in barnaamijyo ay ka mid yihiin falanqaynta ciyaaraha aduunka & faaqidaada koobka aduunka aan ku soo biirino idaacada" ayuu yidhi Mudane Guuleed Casoowe.

Sidoo kale, waxaa uu Mudane Guuleed Casoowe sheegay inay saacadaha ay idaacada hawada ku jirto oo dhan 18 saacadood ay afar saacadood oo ka mid ah ay u qoondeeyeen barnaamijyo wacdi diini ah oo lagu tarbiyadeeyo dhalinyarada iyo wacyi galinta shacabka degaanka.

Maareeyaha Guud ee Waaxda Warbaahinta ee Dawlad Degaanka Soomaalida Mudane Cabdulaahi Xasan (Bare) oo ka hadlaya jadwalka wararka ee idaacadu ay haatan sida tijaabada ah u gudbin doonto waxaa uu sheegay inay idaacadu haatan soo dayn doonto wararka saacadaha Geeska Afrika marka ay yihiin 10:00 (Warkii Xalay), 12:00 (War Cusub) 14:00 (Ku Celin) 16:00 (War Cusub), 18:00 (Ku Celin), 20:00 (War Cusub), 22:00 (Ku Celin).

Sidaa aawadeed waxay Madaxa Xafiiska Warfaafinta Dhaqanka & Dalxiiska & Maareeyaha Wakaalada Warbaahinta (Mass Media Agency) ay shacabka ugu baaqeen inay jadwalka cusub ee idaacada Jigjiga FM 99.1 ay hada kadib sidaa ula socdaan.

Guled Casowe Blog

Madaxa Warfaafinta oo Xafiiska Caafimaadka & Hay'adaha Ka Shaqaynaya Ololaha Talaalka ugu Balan Qaaday Warbaahinta Degaanku Garab Taagan Tahay

Jigjiga (Guled Casowe Blog) Madaxa Xafiiska Warfaafinta Dhaqanka & Dalxiiska Mudane Guuleed Casoowe ayaa saaka Xafiiska Caafimaadka & Hay'adaha aan Dawliga Ahayn ee ka shaqeeya adeega caafimaadka & ololaha Talaaka ugu balan qaaday in warbaahinta Degaanka Soomaalida ee curdinka ah ay garab taagan tahay wacyi galinta dhinaca adeega caafimaadka.

Madaxa Xafiiska Warfaafinta Mudane Guuleed Casoowe oo ka hadlayay kulan saaka lagu qabtay Xafiiska Caafimaadka oo loogu diyaar garoobayay fulinta Talaalka TT oo beri ka bilaambaya Degaanka Soomaalida ayaa waaxyaha ku shaqada leh adeega caafimaadka in Idaacada Jigjiga FM 99.1 ee haatan la furay ay bilowgiiba ka qayb qaataday wacyi galinta dhinaca caafimaadka.

Wuxuu Madaxa Xafiiska Warfaafinta tilmaamay in adeega war baahinta ee Degaanka Soomaalidu uu haatan ku jiro marxalad ugub ah oo u baahan in la sii labanlaabo.

Waxaa kulankan ka qayb galay waaxyaha bulshada & ururada rayidka ah oo iyaguna ku balan qaaday inay garab istaagayaan ololaha talaalka


Guled Casowe Blog

New Video Clip Codka Wiilka Yaa Cajalad Ku Duubta By Ali Bashiir

Ukinnit Exclusive : Aar Maanta the creator of "Afro Hop"

From the legend that was Fela Kuti to a current breed young African music pioneers, United Kingdom particularly London always had a rich African music scene.


A scene lately been ignored by our major media. On a number of special reports, UK INNIT will get the low down on the underground African music scene in the UK.


Africans particularly Somalis are now one of the fastest growing ethnic groups in the UK, yet very little is known about their music. I went to meet a man young British Somalis describe "the voice of our generation."  Because his songs address a range of issues that Somalis face. His name is Aar Maanta he is a Somali singer, writer and music producer.


Aar Maanta is the creator of fresh new musical style, which fuses traditional Somali music with many other styles including House, RnB and Reggae. I caught up with him at Upstairs at the Ritzy, a trendy music venue in Brixton South West London where he recently played.


How would you describe your music?


I call it "Afro Hop." I like all kinds of music that is why you hear so many different flavors on my album from Pop to Reggae blended with traditional Somali music. It is a genre hopping music. That is where I got the term Hop from and the Afro term is because of my African heritage and music roots.


You called your album Hiddo & Dhaqan, which I understand in Somali means Heritage and Culture. Why that title?


Because my people have been at war for the past twenty years and in the process have lost a lot not only in lives but also in terms of culture and heritage. My songs discuss a range of issues relating to this.


My main message is that our habits/culture can change in order to adapt to different situations, but our positive heritage must remain. If you lose your heritage you lose your identity.


Is this the reason why most of your songs are in Somali, and would you ever consider making more English songs in order to widen your audience?


Yes, Somali language is very important to me, I have lived most of my life in the UK, but I prefer to sing in my mother tongue. I don't see that as a negative thing or a rejection to Britain. I love living here, but ultimately I want the wider society to know that there is more to Somalis than been refugees and pirates. If I can teach one none Somali a Somali word, or a melody through my music then I have achieved something that can help bring down barriers between my people and others.


Dorothy Johnson-Laird of Afropop.org said that it is your singing that is most "impressive." What do you enjoy doing most is it producing, writing or singing?


I actually like writing more than singing but I enjoy producing the most. The best feeling is when I am mixing down or mastering a track that I just finished. That is when I am happiest.


To create something interesting UK INNIT like to bring together different acts from completely different genres. Is there anyone from the UK Hip Hop or Grime underground scene you would consider producing or working with?



UK Hip Hop is nice and I have done some production work for Choong Family a while ago. At the moment I really like listening to Low Key MC. A friend of mine introduced me to some of his work recently, I like his message and the honestly of his lyrics. I like artists who stand for something.


What are your plans for the near future are there any shows or exclusives you would like to share with our website members or guests?



I am just preparing for a few shows in Belgium, Holland and possibly a wider European tour. I really enjoy playing live. My band is very diverse and talented, the kind of band you can only find and put together in London. I will also be releasing the next single from my album. The single is called "As salaam Alaikum" it is a song inspired by the universal Islamic greeting which means "Peace be with you."  This song is about the contradicting lives of my people here in the UK and back in Somalia with a concluding message of "live and let live."


Any last words?


Watch out for my next single, video and other exclusives here on UK INNIT. Don't forget to check out Hiddo & Dhaqan album on Amazon, iTunes and all other digital music stores too.  Thank you UKinnit!!


Interview by Raj Tank.

---

Your E-mail and More On-the-Go. Get Windows Live Hotmail Free. Sign up now.

Madaxa Warfaafinta oo La Kulmay Guddiga Midowga Yurub ee Degaanka Soomaalida

Jigjiga (GuledCasoweBlog) Madaxa Xafiiska Warfaafinta, Dhaqanka & Dalxiiska Mudane Guuleed Casoowe ayaa maanta Xafiiskiisa ku qaabilay Wafdiga Guddiga Midowga Yurub u qaabilsan goob joogida Doorashooyinka bishan ka dhic doona Degaanka Soomaalida.


Guddigan oo dhawaanahan joogay Degaanka Soomaalida waxaa ay kala ahaayeen Mudane Robert Jacek Lech iyo Marwo Benedetta Odorisio. Gudiga Goob Joogista Doorashooyinka ee ka socda Midowga Yurub waxaa hogaaminaya Mudane Thijs Berman oo wakiil ka ah baarlamaanka Dutch, ahna xubin ka tirsan Baarlamaanka Midowga Yurub, oo xubin ka ah Xisbiga Shuuciga ee Yurub.


Mudane Robert Jacek Lech iyo Marwo Benedetta Odorisio waxay sheegeen in mandate shaqadoodu ay tahay si waafaqsan xeerka caalamiga ah. Sida uu dhigayo Xeerka Anshaha (u4661), waxaa ergada Midowga Yurub ay yihiin kuwo dhexdhexaad ah oo xor ah.


Waxay Mudane Guuleed iyo Ergada Midowga Yurub waxay ka wada hadleen geedi socodka guud ee marxalada doorashada si waafaqsan xeerka anshaxa doorashooyinka qaranka. Mudane Guuleed waxaa uu tibaaxay sida wanaagsan ee nabadgalyada ah ee ilaa hada ay u socoto ololaha doorashooyinka.


Mudane Guuleed Casoowe waxaa uu ergada Midowga Yurub u sheegay in ololaha doorashooyinka uu haatan socdo, wuxuu kaloo tilmaamay xoriyada ay leeyihiin asxaabta siyaasadeed iyo inay musharixiintooda ay shiriyaan iyo fikradahooda soo dhaweeyaan xoriyada ay u leeyihiin.


Wuxuu Mudane Guuleed Casoowe u sheegay in Xisiyada Siyaasada iyo ashkhaasta sida shaqsiyanka ah u tartamaysa ay u madax banaan yihiin inay shiraan, isku yimaadan, ay qabtaan bandhigyo rally ah, inay shacabka u bandhigaan fikirkooda. Waxaa uu Mudane Guuleed Casoowe xusay in Degaanka Soomaalida uu haatan u soo bislaaday dimuqraadiyada xorta ah oo aan ahayn wax uu si fudud ku helay. Waxaa uu mudane Guuleed guddiga u sheegay in dhawaan magaalada Jigjiga Xisbiga mucaaridka ah ee SoDAF (Somali Democratic Alliance Forces) uu shir ku qabtay, si madax banaana u dhamaystay.
Mudane Guuleed waxaa uu sheegay in doorashadani ay tahay mid si dimuqraadiyeed loo hirgalinayo oo asxaabta siyaasadeed ay xor u yihiin in bilaash ay ku helaan baahinta ujeedooyinka iyo ahdaafta siyaasada xisbigooda, iyagoo adeegsanaya warbaahinta dalka.


Mudane Guuleed Casoowe iyo ergada Midowga Yurub waxay isla soo qaadeen sidii ay wadajir uga wada shaqayn lahaayeen in doorashadan ay noqoto mid si xor, cadaalad iyo dimuqraadiyad ah u dhacda.
Ugu danbaystii waxay Ergada Midowga Yurub ee Mudane Guuleed Casoowe gudoonsiyeen qoraalo iyo cajalado ka hadlaya hawlaha horumarinta ee Midowga Yurub uu ka wado dalka.


GuledCasoweBlog

---

Hotmail: Powerful Free email with security by Microsoft. Get it now.

Dhibaatada Wadada Laga Dhisayo Magaalada Jigjiga & Maamulka Dawlada Hoose oo Ka Aamusan Mashaqada

Jigjiga (GuledCasoweBlog) Waxaa labadii sanno ee u danbeeyay magaalada Jigjiga ka socday mashruuca dhismaha wadada laamiga ah ee magaalada badhtankeeda dhex marta. Wadadan oo markii hore laami (asphalt) ahayd, ayaa waxaa mashruuc laga maalgalinayo dawlada Federaalka loo qorsheeyay in 4 laab balacii hore ee ay lahayd la balaadhiyo iyadoo laga dhigayo wado afar haad ah.


Hadaba wadadan oo dhismaheeda ay qaadatay Shirkad laga leeyahay dalka Shiinaha oo la yidhaahdo RBCC ayaa dadku ay aad uga cabanayaan sida ay uga caga jiidayso hawsha dhismaha ee laamiga. Muddo laga joogo laba sanno iyo saddex bilood ayaa markii ugu horaysay la bilaabay duminta iyo balaadhinta guryaha ku yaalay dhinacyada wadada, waxaana ay shirkada RBCC ay sidoo kale baabi'isay laamigii hore ee wadada ku yaalay iyadoo qiyaastii mitir dhulka hoosta u qoday.



 

Baabi'inta wadadii hore ee laamiga ahayd ayaa magaalada ku keentay in boodh fara badan ay abuuraan gaadiidka isticmaala wadada oo ah halbowlaha ugu muhiimsan ee isku xidhka magaalada. Sidoo kale, ayaa xilligaay roobku da'o, waxaa wadadu ay noqotaa meel aad u dhiiqo badan oo aan la mari karin.


Kadib markii shirkada RBCC uu cadaadis badan kaga yimid dhinaca Xukuumada Degaanka iyo ta Federaalka ayaa ay hawshii dib u bilaabeen iyagoo balse hadana xaasidnimo u caqabadeenaya shacabka magaalada Jigjiga ayaa waxay Shirkada RBCC iyo shirkada u ah Consultantiga oo la yidhaahdo Roughton ay go'aansadeen inay magaalada kala xidhaan iyagoo gooyay dhamaan wadooyinkii dhinaca Waqooyi iyo Koonfur kaga soo dhacayay Wadadan.


Goynta wadooyinka ku soo aroora wadada wayn ayaa dadka badankii u arkaan inayna ahayn wax ku lug leh shaqada ka socota dhisida wadada laamiga ah oo hada taagan ama in yar oo shaqo ah ka wadaan dhanka galbeed ee magaalada. Kala goynta isku socodka gaadiidka & shacabka ayaa sababay in gaadiidka iyo shacabkuba ay maraan wadooyin googo'an oo dhibaato badan u keenta gaadiidka shacabka.


Waxaa aad u adag in aad magaalada hadii aad joogto dhinaca koonfureed (xaafadaha 01,02, 03, 04, 08, 09, iyo 010,) aad u gudubto dhinaca waqooyi (xaafadaha 05, 06, 07, 011,). Waxaa ay iskuulada iyo goobihii ganacsiga ahaa ka hor qodeen godad aad u dhaadheer oo ayna xil iska saarayn inay ka ilaaliyaan in dhibaato shacabka ka soo gaadho. Intii aan wadnay baadhitaanka dhibaatada laamiga ah waxaa naloo sheegay in laba caruur ah oo arday ka ahaa dugsiga Hoose Dhexe ee Wiilwaal ay dhibaato ka soo gaadhay markii ay ku dhaceen godadka laga hor qoday Dugsiga hortiisa.


Dhinaca kale, Wasiirka Hawlaha Guud  Eng Faysal oo aan waxa ka waydiinay mashaqadan ayaa noo sheegay in ka badan kun jeer uu maamulka Dawlada hoose kala hadlay inay dhibaatan dadka haystada wax laga qabto. Wuxuu Wasiirku sheegay in "Waxaad arkaysaa wadooyin aan wax shaqo ah laga haynin hadana ujeedo kale loo xidhayo." Isaga oo hadalkiisa sii wada ayaa Wasiirku yidhi "Shirkadan dhisaysa wadadan waxay u dhaqmaysaa si ka duwan sida ay degaamada kale uga shaqayso, taasina ma aha wax loo dul qaadan karo. Hadii shaqo lawado xataa, waa in aan dadka lagu dhibaatayn oo wadada inta shaqada lagu hayo mooyee inta loo furaa oo loo fududeeyaa shacabka" ayuu yidhi Wasiirku.


Dhinaca kale, Maamulka Dawlada Hoose oo kala ah Duqa Magaalada Jigjiga Mudane Cabdisalaan Axmed Ibraahin iyo Ku Xigeenka Duqa Magaalada Xaaji Yuusuf Sheeekh Cabdi ayaa u muuqda inayna wax dan ah ka lahayn dhibatada lagu hayo shacabka. Waxaad daafaha wadada kala xidhan ee magaalada Jigjiga aad ku arki qof curyaan ah oo aan magaalada dhinaca uu joogo mooyee dhinaca kale u talaabi karayn, taasina waa arrin aad looga murugoodo oo qofka damiirka leh uuna u adkayysanayan.



Dhinaca kale, Madaxa Xafiiska Warfaafinta Dhaqanka & Dalxiiska Mudane Guuleed Casoowe oo aan arrimahan wax ka waydiinay ayaa noo sheegay in dhibaatada inta arkayaa ay tahay wax yar oo dhibka ugu wayn ee shirakadan RBCC iyo Roughton ay degaanka ku hayaan ay tahay wax aad looga naxo. Waxaa uu Mudane Guuleed Casoowe BBC tusay sawir laga soo qaaday Figta Sare ee Buurta Kaaramardha halkaas oo lagu arkay khasaaraha laxaadka leh ee bii'o ee shirkadahan ku hayaan Degaanka.



Sawirka waxaa uu muujinayaa in dhul aad u wayn oo ku yaala cidhifka Bari ee Buurta Kaaramardha ay shirkadahan u gaysteen dhaawac aad u balaadhan iyagoo dumiyay qar aad u wayn, isla markaana mashaqeeyay (polluted) degaankii iyo bii'adii ku hareeraysneed meeshaa. Waxaa uu Mudane Guuleed Casoowe uu sheegay in "Dhagaxa & carada ay ka qaadaan halkan ayaa lagu dhisaa wadada u dhaxaysa Baabili & Harar oo ka tirsan Degaanka Orromiya. Dhibaatada bii'o ee ay abuureen waxay khasaaraheedu gaadhaysaa Bilyan Birr" ayuu yidhi Mudane Guuleed Casoowe.


Buurta Kaaramardha oo ah Buur aad u caan ah ayaa waxaa xukuumadihii hore ay ahayd aag milatari, taasoo faa'iido badan u keentay in Buurtu ay ka badbaado polution iyo in lagu ciyaaro. Balse, maanta miyay Dawlada Hoose garan wayday in dhaawaca loo gaystay Buurta KaaraMardha uu dhibaato u gaysanayo adeega dalxiiska ee Degaanka Soomaalida.



Isku soo wada duuboo, Maamulka Dawlada Hoose ayaanan u muuqanin inuu ka hadlo ama wax ka yidhaahdo dhibaatada haysatda Shacabka ku nool Magaalada Jigjiga. Dhaqaale burburka, dhaawaca jismiyeed ee soo gaadhaya shacabka iyo hantida shacabka iyo ta dawlada ayaa ah wax aan cadad lagu qiyaasi karin.


Sawirkan waxaa uu muujinayaa dhibaatada bii'o ama degaaneed ee ku habsatay Magaalada Jigjiga ilaa intii dhismaha wadada laamiga ah la bilaabay.


GuledCasoweBlog

---

Hotmail: Powerful Free email with security by Microsoft. Get it now.

Madaxa Warfaafinta oo La Kulmay Qurbo Joog Maalqabeeno ah oo ka Yimid Dalka Koonfur Afrika

Jigjiga (GuledCasoweBlog) Madaxa Xafiiska Warfaafinta Dhaqanka & Dalxiiska ayaa la kulmay qurbo joog ganacsato ah oo ka yimid dalka Koonfur Afrika oo maalgashi u yimid Degaanka Soomaalida.


Maalqabeenada oo kala ah Mudane Iishaar Maxamed Doolaal, Nuur Axmed Hudle, Cusmaan Cali Abshir, Cabdiraxmaan Sheekh Maxamuud, Cabdiraxmaan Sheekh Maxamed Saahid, Abshir Aadan, & Badri Cabdiraxmaan.


Madaxa Warfaafinta & Maalqabeenada waxay ka wada hadleen arrimo badan oo ku saabsan siyaasada horumarka ee Degaanka iyo koboca maalgashiga ee Degaanka Soomaalida ka socda.


Sidoo kale, waxay wafdiga qurb joogta ka yimid dalka Koonfur Afrika ay kulamo kala gadisan la yeesheen Hogaanka Maamulka Cadaalada & Nabadgalyada Mudane Cabdi Maxamuud Cumar, Madaxa Xafiiska Maalgalinta Mudane Qalbi Axmed Jaamac, iyo Madaxa Xafiiska Dhalinyarada & Ciyaaraha ee Degaanka Soomaalida Mudane Farxaan Xuseen Cabdi.
CakaaraNews

---

Hotmail: Trusted email with powerful SPAM protection. Sign up now.

Madaxa Warfaafinta oo Gudoomay Hal-Abuur & Xubinimada Somali Pen ee Degaanka Soomaalida

Jigjiga (CakaaraNews) Madaxa Xafiiska Warfaafinta Dhaqanka & Dalxiiska Dawlad Degaanka Soomaalida Mudane Guuleed Casoowe ayaa maanta Xafiiskiisa ku qaabilay ergayda ka socotay Xarunta Dhexe ee Halabuur iyo xidhiidhka qalinlayda Af Soomaaliga ee Afka Qalaad loogu yeedho Somali Pen.


Ergayda Halabuur oo fadhigoodu yahay Jamhuuriyada Jabuuti oo ay hor kacayeen Tifatiraha Guud ee Halabuur ahna Gudoomiyaha Bahwaynta Qalinleyda Afka Somaaliga Dr Maxamed Daahir Afrax, Tifatire Aadan Xasan Aadan (Beleloo), Maareeyaha Farsamada ee Halabuur Cumar Siciid Bille, waxaa kaloo wafdiga ergada Halabuur la socday Cusmaan Buux Odowaa & Abubakar Saliid Buux.
Kulankan oo loogu gol lahaa daah furka Wargey Xilliyeedka Suugaanta iyo Dhaqanka Soomaalida ee Halabuur oo laga sameeyay Caasimada Dawlad Degaanka Soomaalida ee Jigjiga waxaa si wadajir ah isaga kaashaday Xafiiska Warfaafinta Dhaqanka & Dalxiiska, Jaamacada Jigjiga, iyo Xafiiska Waxbarashada ee Degaanka Soomaalida.


Kulankan maanta ka dhacay Xafiiska Warfaafinta ayaa waxaa goob joog ka ahaa Masuuliyiinta ugu sareeya ee Jaamacada Jigjiga iyo Ku Xigeenka Xafiiska Waxbarashada Mudane Cabdulaahi Gisile. Waxaa kaloo kulankan maanta goob jpoog ka ahaa Gudoomiyaha Degmada Jigjiga.


Kulankan oo uu furay Madaxa Xafiiska Warfaafinta Dhaqanka & Dalxiiska Mudane Guuleed Casoowe ayaa waxaa uu ka hadlay muhiimada uu leeyahay afka Hooyo & xilka dadka ka wada saaran sidii loo ilaalin lahaa loona kobcin lahaa Afka Soomaaliga.


Waxaa dabadeed hadalka qaatay Guddomiyaha Naadiga Qalinleyda iyo Halabuurka Soomaaliyeed (Somali Speaking Pen), Maxamed Daahir Afrax oo Warbixin guud oo dheer halkaa ka soo jeediyay, taas oo uu sawir cad ka bixiyey marxaladihii kala duwanaa ee ay uu soo maray Naadiga Somali Pen.
Munaasabaddan waa fursad qaali ah, waxaana ku faraxsannahay in aynu u kulannay ujeeddo qaali ah oo ah horumarinta hal-abuur ku qoran afka Hooyo,"ayuu yiri Maxamed Daahir Afrax oo intaas ku sii daray.


"Waxaan aad ugu faraxsannahay in aan anagoo hal meel ku wada kulano Xafiiska Warfaafinta, Jaamacada Jigjiga, Xafiiska Waxbarashada, Halabuur & Somali Pen, waxaan u qaadaneynaa in ay yihiin saaxibada qalin-leyda, hal-abuurka iyo dhaqanka Soomaaliyeed. Waa fursad qaali ah" ayuu yiri Guddoomiyaha Somali-Speakin PEN.


Guddoomiyaha Naadiga PEN ee Qalinleyda iyo Hal-Abuurka Soomaaliyeed Dr. Maxamed Daahir Afrax waxaa uu intaas ku daray in ay damacsan yihiin inay Xafiiska Warfaafinta Dhaqanka & Dalxiiska ay iska kaashanayaan sidii Caasimada Jigjiga looga abuuri lahaa Munaasabadda Carwo Buugeed oo leh seddex ahmiyadood oo kala ah:


1) Hirgelinta Erayga qoran
2) Horumarinta hal-abuurka ku qoran Afka Hooyo
3) Himad-gelinta iyo u hiilinta qorayaasha soo koraya, siiba kuwa wax ku qoraya Afka Hooyo, Soomaaliga.


Sidoo kale, waxaa madasha ka hadlay Mudane Aadan Xasan Aadan, Cumar Siciid, Cabdulaahi Gizile iyo masuuliyiin kale oo fara badan.
Ugu danbayntii waxay ergayda Halabuur & Somali Pen iyo masuuliyiintii ka socotay Xukuumada Degaanka Soomaalida & Jigjiga University ay booqashooyin kala duwan ku kala bixiyeen machadyada & xarumaha waxbarashada ee ka jira Degaanka Soomaalida.
CakaaraNews

---

Your E-mail and More On-the-Go. Get Windows Live Hotmail Free. Sign up now.

Fanaanad Cadar Axmed Kaahin oo Si Heer Boqorad Loogu Soo Dhaweeyay Caasimada Jigjiga

Jigjiga (CakaaraNews) Fanaanada caanka ah ee Cadar Axmed Kaahin ayaa maanta si heer sare ah loogu soo dhaweeyay Caasimada Dawlad Degaanka Soomaalida ee Jigjiga. Fanaanada oo ka soo kicintay cariga Maraykanka bishan aan ku jirno 3deedii ayaa xalay saqdii dhexe soo gaadhay Gegida Dayuuradaha Caalamiga ah ee Bole International Airport ee Magaalada Addis Ababa.
Waxaa fanaanada Gegida Bole ku sugayay masuuliyiin ka socotay Xafiiska Warfaafinta Dhaqanka & Dalxiiska ee Dawlad Degaanka Soomaalida kuwaas oo ilaa saaka salaadii subax fanaanada ku wehelinayay ilaa intii ay transitka ku ahayd Gegida Diyaaradaha ee Bole International Airport.
Kadib waxay Fanaanadu u soo anbabaxday dhanka Caasimada Dawlad Degaanka Soomaalida ee Jigjiga iyadoo si VIP ah loogu soo qaaday dayuurad ay leedahay shirkada Ethiopian Airlines. Intii ayna diyaarada ay la socotay fanaanadu ayna soo caga dhigan Jigjiga International Airport waxaa gegida dayuuradaha isku xoomay dadwayne aad u fara badan.
Waxaa Fanaanada Cadar ilaa intii ay ku soo jirtay duulimaadkeeda ilaa Caasimada Dawlad Degaanka Soomaalida ee Jigjiga lagu sharfayay marti qaad iyo tixgalin gaar ah oo ay u samaynayeen shaqaalaha iyo marti soorka diyaarada dhexdeeda oo marti qaadka uu ka mid ahaa.

Waxaa kaloo gegida dayuuradaha ee Jigjiga Airport ku sugnaa madax & masuuliyiin fara badan oo ka socday Xukuumada Dawlad Degaanka Soomaalida oo ay hor kacayeen Madaxa Xafiiska Warfaafinta Dhaqanka & Dalxiiska Mudane Guuleed Casoowe, Madaxa Komishinka Booliska Degaanka Soomaalida Mudane Yuusuf Jalaale, Komishinka Asluubta Mudane Cabdi Bade Cusmaan, Ku Xigeenka Xafiiska Ka Hortaga & U Diyaar Garowga Masiibooyinka DDS Mudane Khadar Cabdi Ismaaciil, Agaasinka Qorshaynta & Barnaamijyada Xafiiska HAPCO Mudane Maxamuud Heeryo, Agaasinka Qorshaynta Xafiiska Caafimaadka Mudane Cabdiraxmaan Aadan (Hereri), Madaxa Xafiiska Maalgalinta Mudane Qalbi Axmed.
Waxaa kale oo dadwaynaha soo dhawaynayay fanaanada Cadar Axmed Kaahin ka mid ahaa fanaaniinta fanka & sugaanta ee Dawlad Degaanka Soomaalida oo ay ka mid yihiin kooxaha Wadani Stars, Kooxda Ilays Band, Kooxda Qureysh Fiiq Band iyo kuwo kale. Waxaa kale oo iayagana Fanaanada ku soo dhaweeyay Haween badan oo isugu jira asxaab, qaraabo, ehel, ganacsato & masuuliyiin ka tirsan Xukuumada Degaanka Soomaalida.
Dayuuradii siday Fanaanada Cadar Axmed Kaahin ayaa abaaro 11:00 Barq  animo soo caga dhigatay gegida waxaana hal mar wada yeedhay sawaxan iyo luuqda jaanta & jabaqda ay sameenayeen kooxaha hidaha & dhaqanka oo Dhaanto ku soo dhaweeyay fanaanada. Kadib markii la furay albaabkii diyaarada ayaa waxaa ka soo baxay Fanaanada Cadar Axmed Kaahin oo labada gacmood kala hayaan labadii Pilot ee diyaarada waday oo si sharaf leh uga soo dajiyay jaranjartii diyaarada.
Fanaanada ayaa markii ay cagaheeda taabteen dhulka hal mar labadeeda indhood ka soo boodeen ilmo kulul iyadoo farxad la ilmaysay markii ay aragtay sida sharafta leh ee loo soo dhaweeyay. Waxaa fanaanada diyaarada hoosteeda ubax ugu dhiibay gabadh yar oo qoortana u sudhay ubax iyo qoor xidh sharfeed.
Fanaanada oo labadeeda indhood ay wali ilmadu ka hoorayso ayaa bilowday gacan qaad inay ku salaanto madaxdii soo dhawaynaysay oo iyaga laftooda la qiirooday shucuurta fanaanada iyo weedhaha salaanta ah ee fanaaniintu ay ku luuqanayeen. Waxaa gegida dayuuradaha laga bilaabay ciyaaro dhaqameed isugu jira Dhaanto, Wilwilo & Buraanbur kala gadisan oo lagu amaanayo laguna dhiiri galinayo sharafta fanaanada timid dhulkeeda hooyo.
Fanaanada & madaxdii ayaa halkaas ciyaaraha kula ciyaaray fanaaniinta iyadoo Marwo Cadar Axmed Kaahin ay marba qof salaantii ku dul ooyayso. Weedhii qudha ahayd ee ka soo baxday Cadar Axmed Kaahin ayaa ahayd "Waligay dad waan soo dhawayn jiray, laakiin laba shey ayaa maanta igu kalifay in aan la ilmeeyo. Mida koowaad waxay tahay, waligay ma arag wax i soo dhaweeya, waligayna ma arag sidan boqornimada leh ee la ii soo dhaweeyay. Mida labaad waxay tahay isma lahayn dhul & dad aad leedahay ayaad ka maqan tahay. Maantase waxaan xaqiiqsaday in aaan riyadaydii gaadhay".
Kadib markii ay fanaanada & dadkii soo dhawaynayay ay ka soo anbabaxeen Gegida dayuuradaha ee Jigjiga waxau kolonyadii gawaadhida ahaa ee galbinayay fanaanada ay u baqooleen dhanka magaalada Jigjiga iyadoo ilmadii ka socotay fanaanada indhaheeda ay isku badaleen shucuur farxadeed & raynrayn. Waxaa dabadeed la isugu tagay barxada Huteelka Xamda ee Caasimada Jigjiga halkaas oo fanaaniinta Degaanka Soomaalida & Marwo Cadar Axmed Kaahin ay ku qabsadeen ciyaaro Dhaanto ah oo kala duwan.
Isku soo wada duuboo, imaatinka Fanaanada Cadar Axmed Kaahin oo ah fanaanad u dhalatay Degaanka Soomaalida ayaa maanta si aad ah looga dareemayay dhamaan daafaha Caasimada Jigjiga, iyadoo shacabka ku nool Gobolka Dhagax-Buurna ay taleefanada cidhiidhi galiyeen sida ay isaga xog waraysayeen imaatinka Fanaanada Cadar Axmed Kaahin.
Mar ay Fanaanada Cadar Axmed Kaahin ay la hadashay saxaafada iyadoo ku sugan qolka nasashada ee Hotelka Xamda, waxay mahad gaar ah u celisay Madaxwaynaha Degaanka Soomaalida Mudane Daa'uud Maxamed Cali & Hogaanka Maamulka Cadaalada & Nabadgalyada Mudane Cabdi Maxamuud Cumar oo ay sheegtay inuu galiyay rajada inay soo booqato dhulkeeda hooyo inta ay nooshahay.
Waxay Fanaanadu sheegtay in Hogaanka oo ay taleefan ku wada hadleen uu u sheegay in ay degaankan u wada dhasheen. Waxay fanaanadu sheegaty inuu Hogaanku ku yidhi "Kaama xigo Degaankan oo waan u wada dhalanay, qof kaa xigana ma leh, xor baadna u tahay inaad timaado iyo inaad ku noolaato".Waxay fanaanadu carabka ku dhufatay in Hogaanku u cadeeyay in sidii ay hore warbaahinta & saxaafada uga sheegeen inay dhiiri galinayaan in dadka degaankan u dhashay ee ku sugan qurbaha ay xor u yihiin inay yimaadaan dhulkooda oo ay maal gashadaan.
Waxay fanaanadu sidoo kale u mahad celisay Madaxa Xafiiska Warfaafinta Dhaqanka & Dalxiiska oo ku dhiiri galiyay inay dalkeeda & degaankeeda soo booqato oo ilaa soo dhawayntaa aadka u qaayaha badneed u diyaariyay. Waxayna fanaanadu tidhi "Maanta ayaan noqday Boqorad u dhalatay Degaanka Soomaalida oo leh calan & dawlad lagu hirto".
Sidoo kale, Madaxa Xafiiska Warfaafinta Dhaqanka & Dalxiiska Mudane Guuleed Casoowe ayaa tilmaamay in imaatinka Cadar Axmed Kaahin ay galisay shucuur wadanimo & mid degaaneed. Wuxuu Mudane Guuleed yidhi "Waxaan ilmada ka da'aysay indhaha Fanaanada Cadar Axmed Kaahin aan ka dareemay in ayna jirin meel lagu doorsan karo dhulkaaga hooyo". Isagoo hadalkiisa sii wata wuxuu Mudane Guuleed Casoowe raaciyay "Waxaa gubayay Fanaada Cadar Axmed Kaahin waa marti soorka ay ku aragtay tan iyo intii ay soo gaadhay dalka Itoobiya laga soo bilaabo xalay saqdii dhexe oo ay ku sugnayd caasimada Addis Ababa oo Xafiiska Warfaafinta Dhaqanka & Dalxiiska uu ugu diyaariyay koox halkaas ku madadaalisa fanaanada inta ay ku jirto transitka sugida duulimaadka Jigjiga & soo dhawyntii aan loo kala hadhin ee ay ku aragtay Caasimada Jigjiga". ayuu yidhi Mudane Guuleed Casoowe.
CakaaraNews

---

Hotmail: Free, trusted and rich email service. Get it now.

Tartanka Gabayada oo Lagu Qabtay Caasimada Jigjiga

Jigjiga (CakaaraNews) Tartanka 1aad ee Gabayada & Suugaanta Degaanka Soomaalida ayaa maanta lagu qabtay Hoolka Shirarka Sayid Maxamed Cabdule Xasan ee Caasimada Degaanka Soomaalida ee Jigjiga.


Tartankan oo uu soo qabanqaabiyay Xafiiska Warfaafinta Dhaqanka & Dalxiiska ee Degaanka Soomaalida ayaa ah midkii ugu horeeyay ee noociisa ah ee lagu qabto Degaanka Soomaalida.


Tartankan oo ay ka soo qayb galeen tartamayaal tobaneeyo ah waxaa kaloo ka soo qayb galay marti sharaf isugu jirta masuuliyiinta Xukuumada Degaanka Soomaalida, bulshada rayidka ah & ardayda cilmiga social science ee dhigata fasalka 11aad ee Dugsiga Sare ee Jigjiga.
       
Waxaa tartankan tartamayaasha kala duwan u garsoorayay abwaano waawayn oo aadka looga danbeeyo dhinaca maansada suugaanta & dhaqanka e bulshada Degaanka Soomaalida.
      
Waxaa abwaanada ka mid ahaa Abwaanka Weyn ee gabyaaga ah ee Cabdulaahi Macalin Axmed (Dhoodaan), Abwaanka Daahir Cudhaadh, Abwaan Axmed Sheekh Cabdiraxmaan (Axmed Shiine), Gabyaa Faarax Gaarane Cabdi & Gabyaa Tirfe
        

Tartankan oo aad u xiisa badnaa ayaa waxaa bilowgii furay Madaxa Xafiiska Warfaafinta Dhaqanka & Dalxiiska ee Dawlad Degaanka Soomaalida Mudane Guuleed Casoowe oo aad ugu hambalyeeyay ka soo qayb-galayaasha sida geesinamada leh ee ay ugu soo dhiiradeen inay ka qayb qaataan tartankan oo aan hore Degaanka Soomaalida looga qaban.

Kadib khudbadii Madaxa Xafiiska Mudane Guuleed Casoowe waxaa loo guda galay tartankii gabayada, iyagoo tartamayaal tiradoodu dhan tahay 13 tartame ay muddo 3 saacadood ah soo jeedinayeen gabayo ay ku sharaxayaan halku dhiga tartankan loo qaatay oo ahaa "Horumar & Nabadgalyo".

Tartamayaasha oo isugu jiray dhalinyaro, arday, haween, shaqaale dawladeed, xubno booliska ka tirsan, culimo u diin, indheer garad, & aqoon yahan waxaa ay ka kala socdeen dhamaan qaybaha kala gadisan ee bulshada Degaanka.


Magacyada tartamayaasha ayaa kala ahaa sidan soo socota

1) Badal Cabdulaahi Geele oo ku guulaystay kaalinta 1aad
2) Maxamed Muxumed Axmed oo ku guulaystay kaalinta 2aad
3) Cabdi Cali Nuur (Saxardiid) SPDP  oo ku guulaystay kaalinta 3aad

4) Mustafe Shariif Maxamed
5) Cabdi Khadar Xasan Jaamac
6) Cismaan Maxamed Xuseen
7) Nuur Burjar Faarax, Jigjiga University
8) Axmed Cabdi Caagane
9) Axmed Daahir Sugaal
10) Axmed Bashiir Qaraf
11) Hibo Axmed Diiriye
12) Sheekh Aadan Abaadir
13) Sharmaarke Nimcaan Cusmaan


 




Ugu Danbayntii markii ay guddiga Garsoorka ee Abwaanadu soo go'aamiyeen sida ay ugu kala darajo siiyeen dhamaan tartamayaashii ka qayb galay tartanka Gabayada ee Degaaanka Soomaalida, ayaa Madaxa Xafiiska Warfaafinta, Dhaqanka & Dalxiiska waxaa uu abaal marin gudoonsiiyay saddexda gabyaa ee ku kala guulaystay kaalimaha 1aad ilaa 3aad.

           
Waxaa ugu danbaystii khudbado gaagaab ka jeediyay Abwaan Gabyaa Cabdulaahi Macalin Axmed Dhoodaan & Abwaan Axmed Shiine oo hambalyo iyo bogaadin u jeediyay Xafiiska Warfaafinta, Dhaqanka & Dalxiiska oo isagu markii ugu horaysay gartay muhiimada ay leedahay kobcinta maansada & suugaanta Soomaalida.
                        
Waxaa kale oo khudbad guubaabo & dardaaran ah jeediyay Madaxa Xafiiska Waxbarashada ee Degaanka Soomaalida Mudane Cabdiraxamaan Sheekh Maxamed Bulxan (Gurey) oo ardaydii goob jooga ahayd ee cilmiga Social Science dhiganaysay ku booriyay inay wax ku qaataan sidii ay u ilaalin lahaayeen suugaanta Soomaalida.

                      

Tartankan oo ay ka soo qayb galeen masuuliyiin ay ka mid yihiin Madaxa Xafiiska Dhalinyarada & Ciyaaraha Mudane Farxaan Xuseen, Madaxa Xafiiska Maalgalinta Mudane Qalbi Axmed, Ku Xigeenka DPPB, Mudane Khadar Cabdi Ismaaciil, Ku Sii Simaha Xafiiska HAPCO, Mudane Maxamuudf Heeryo. Madaxa Arrimaha Xisbiga ee Xarunta Dhexe ee XDSHS Mudane Ilyaas Cumar.


Sidoo kale, waxaa tartankan oo ay goob ka ahaayeen wafdigii ka socday Qurbo-Jooga khaasatan bahda Jigjiga TV ee dhawaanahan booqashada ku joogay Degaanka Soomaalida, ciyaaro dhaanto oo kala nooc nooc ah dhex taal ahaan ugu soo bandhigayay Dhalinta Caanka ku ah Fanka Qoobka Ciyaarka & Boodista Dhaantada ee Wadani Stars oo uu hor boodayo Fanaanka Dhaantada Sannadkan ee DDS Fanaan Cali Bashiir.



CakaaraNews

---

Your E-mail and More On-the-Go. Get Windows Live Hotmail Free. Sign up now.